Lezhianët dhe Durrsakët kryesojnë kreditimin, – Rritet me 13% dhe 10% huaja per individet ne T2, Tiranasit, të fundit, me vetëm 2%

Referuar të dhënave të publikuara nga Banka e Shqipërisë për “Huatë për individët sipas rrethit dhe qëllimit të përdorimit”, në tremujorin e dytë, në total arriti në vlerat e 210 mld lekë duke shënuar vlerën më të lartë të huamarrjes, rritje që fiksohet në 4.11%.

Huatë për individë sipas rrethit rezultojnë me rritje për të gjitha rrethet e përfshira në raport. Kështu, rrethi i Lezhës shënon rritjen më të madhe për sa i përket huave, rreth 13% fiksohet rritja për këtë rreth ose shprehur në vlera monetare do të ishte rreth 427 mln lekë. Rritje të konsiderueshme kanë edhe rrethet si ai i Durrësit, ku rritja në totalin e huave fiksohet në 10% dhe rrethi i Fierit për të cilin, rritja për tremujorin e dytë arrin në vlerat e 9.51%. Për rrethe si Elbasani, Korça dhe Shkodra rritja në totalin e huave për tremujorin e dytë përllogaritet në rreth 6%.

Për tremujorin e dytë të 2021, nivelin më të lartë të totalit të huave e gëzon rrethi i Tiranës me reth 133 mld lekë. Krahasimi me tremujorin që lamë pas tregon se ky rreth shënoi rritje me 2.06% ose shprehur në mjete monetare do të ishte 2.7 mld lekë në totalin e huave për individë, njoftojnë shifrat. Rrethet që përfshihen në grupin “Të tjera”, paraqiten me një rritje prej 6.5% në totalin e huave ose shprehur në vlerë absolute, 1.9 mld lekë.

*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.