Barometri Ekonomik Scan: 31% e familjeve me të ardhura deri në 30 mijë lekë në muaj

Në një tjetër vrojtim të Barometrit Ekonomik Scan të publikuar nga “Radio Televizioni Scan” dhe “Scan Intelligence Unit” në bashkëpunim me “IDRA Research & Consulting”, flitet për madhësinë e familjeve shqiptare si edhe për të ardhurat e tyre mujore. Nga të dhënat, shohim se pothuajse gjysma e të anketuarve ose e shprehur në përqindje 46%, kanë deklaruar se familja e tyre përbëhet nga 3 deri në 4 persona. Përqindja më e ulët shkon për familjet me 1 deri në 2 persona, 16% e tyre kanë thënë se janë 1 deri në 2 anëtarë në familjen e tyre dhe 38% janë familje me 5 ose mbi 5 pjestarë.

Referuar sasisë së përgjithshme të të hyrave mujore në familjet shqiptare shohim se të dhënat nuk paraqiten aq pozitive, duke qenë se shpezimet janë në rritje e gjithashtu duke marrë parasysh dhe madhësinë e familjes. Rreth 31% e të anketuarve janë shprehur përmes anketës se të ardhurat e tyre mujore shkojnë në 30 mijë lekë dhe vetëm 9% e tyre kanë të ardhura mujore mbi 100 mijë lekë. Nga të dhënat po ashtu shohim se më pak se një në katër persona ose e shprehur në përqindje 22% e të pyeturve kanë thënë se të ardhurat e tyre mujore prekin vlerën e 31 mijë lekë deri në 50 mijë lekë. Rreth 27% deklaruan të kenë të ardhura familjare midis 50 mijë lekë deri në 70 mijë lekë dhe 12% thanë se kanë të ardhura deri në 100 mijë lekë. Theksojmë se 11% e persona të anketuar kanë hezituar të përgjigjen për këtë pyetje.