Nga 
Paga mesatare bruto në Shqipëri ka pësuar rritje më 8.4% gjatë tremujorit të katërt të vitit që lamë pas, tregojnë të dhënat më të fundit të “Institutit të Statistikave”, mbi statistikat e pagave. Gjatë tremujorit të katërt të vitit 2021, paga mesatare bruto për një të punësuar me pagë llogaritet në 59,565 lekë. Të dhënat tregojnë se rritja e pagës nuk vërehet vetëm në ndryshimet vjetore, por dhe në ato tremujore. Kështu, shifrat regjistrojnë një rritje prej 5.5% të pagës për tremujorin e katërt të vitit 2021, krahasuar me tremujorin e tretë të vitit 2021. Nëse do të krahasonim ndryshimin vjetor të pagës sipas aktivitetit ekonomik,norma e përgjithshme tregon se paga mesatare bruto ka pësuar rritje në të gjitha aktivitetet. Krahasuar me të njejtin tremujor të vitit të kaluar, rritjen më të madhe prej 11.8% e ka pësuar paga në aktivitetin “Tregtia, transporti, aktivitetet e akomodimit dhe shërbimit ushqimor”. Aktiviteti i dytë ku paga ka pësuar rritjen më të lartë gjatë tremujorit të katërt të vitit 2021, krahasuar me të njejtën periudhë të një vitit më parë është “Industria”, me 11.2%. Ndjek në renditje “Bujqësia, pyjet dhe peshkimi”, me 10.5%. Nga ana tjetër, rritjen më të vogël e ka aktiviteti i “Pasurive të paluajtshme, aktivitete shkencore, profesionale dhe teknike, aktivitete të shërbimeve administrative dhe mbështetëse”, prej 5,7 %.
Por, cilat janë akvitetet e ekonomisë që ofrojnë pagat më të larta për punonjësit? Sipas shifrave mbi statistikat e pagave, aktivitetet financiare dhe të sigurimit janë në vend të parë, me një pagë mesatare bruto mujore, në rreth 122 mijë lekë. Paga mesatare mujore bruto për një të punësuar me pagë, në sektorin e aktiviteteve financiare dhe të sigurimit është 2.1 herë më e lartë sesa mesatarja në nivel kombëtar. “Informacioni dhe Komunikacioni” është sektori i dytë, i cili ofron pagën më të lartë, me 90 mijë lekë. “. Në vend të fundit renditet “Bujqësia, pyjet dhe peshkimi” me 35 mijë 881 lekë, si dhe “Ndërtimi” me 44 mijë e 949 lekë. Për grup-aktivitetin, “Bujqësi, pyje dhe peshkim”, paga është 38.9% më e ulët se paga mesatare bruto në nivel kombëtar.
*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.
Comments