Transporti ajror vazhdon të vuajë pandeminë. Numri i pasagjerëve ulet me 57% krahasuar me vitin 2019

Të dhënat më të fundit të Institutit të Statistikave bëjnë me dije se transporti të pasagjerëve, është rritur ndjeshëm si në rrugë detare po ashtu edhe në rrugë ajrore e hekurudhore, krahasuar me një vit më parë. 132 181 është numri i pasagjerëve gjithsej i regjistruar gjatë prillit të këtij viti, ku nga këto pasagjerë, 101.354 kanë udhëtuar në rrugë ajrore, 30.413 në rrugë detare dhe 414 me hekurudhë. Transporti i pasagjerëve në rrugë ajrore dominon duke u rritur kështu me gati 25,4 herë po ta krahasojmë me prillin e vitit 2020 dhe duke zënë 76,7% të transportit gjithsej. Megjithatë kemi një ulje të ndjeshme krahasuar me vitin 2019, ku shifrat sinjalizojnë se numri i pasagjerëve që udhëtojnë me linjë detare është ulur me 59%, ai me linjë ajrore me 57% dhe në linjë hekurudhore është ulur me 93%. Krahasuar me një muaj më parë, numri i pasagjerëve që kanë udhëtuar me linjë ajrore ka pësuar rrritje. Në mars regjistroheshin 82 872 pasagjerë në linjë ajrore, një rritje kështu këtë muaj me gati 22.3%. Nëse do të flisnim për tremujorin e parë të vitit 2021, numri i pasagjerëve rezulton më i ulët se gjatë katërmujorit të parë të vitit të kaluar, si në rrugë detare ashtu edhe në rrugë ajrore. Vetëm transporti i pasagjerëve me hekurudhë ka pësuar rritje krahasuar me vitin 2020.

Volumi i mallrave në rrugë detare, të ngarkuara dhe shkarkuara në porte, në muajin prill të vitit 2021 është 451,6 mijë ton, duke u rritur 27,7% krahasuar me prillin e vitit 2020. Të dhënat tregojnë se transporti detar dominon krahasuar me llojet e tjera të transportit. Në muajin Prill 2021, volumi i mallrave të transportuara me ajër është 161 ton, duke u rritur 2 herë, ndërsa volumi i mallrave të transportuara me hekurudhë është 2.333 mijë ton-kilometër, duke u rritur 3,1 herë, krahasuar me të njejtin muaj të një viti më parë. Sipas informacionit të publikuar nga INSTAT po të flasim në terma katërmujorë volumi i mallrave shënon një rritje me 18,1%, krahasuar me katërmujorin e parë të vitit 2020.

Sa i përket importit dhe eksportit të mallrave vendi ynë ka hasur një rritje të përgjithshme të tyre në të gjitha llojet e transportit kryesisht atij detar dhe rrugor. Vlera totale e mallrave të tregtuara (eksport dhe import) është 91,6 mld lekë dhe 46,8% e tyre janë transportuar në rrugë detare.

*Material i përgatitur nga SCAN INTEL. Ripublikimi mund të bëhet vetëm kundrejt citimit të autorësisë dhe burimit origjinal.